الشريف عبد المحسن بن عبد العزيز بن عبد الله بن عبد المطلب , أبو محمد الحارثي الهاشمي، الراوية , الشاعر

يقول الحارثي قافٍ بنيته من جِديد أبياتْ = بيوتٍ كنها ذوب العَسَلْ من طيب الاقراحِ
بديت بذكر علاّم الغيوب وغافر الزلاتْ = اليا مني ذِكَرْتَه باللسان الهمّ ينزاحِ
وقد فكرت في الدنيا على الحاضر وماهو فاتْ =احدٍ من بحرها سالم وواحد في بحرها طاحِ
ولا يا عاشق الدنيا ترى في دربها لفَّاتْ = توردك المهالِك وأنت لا نايم ولا صاحِ
تحذّر وانْتِبه للنفس لا ترميك للشبهاتْ = وخَلَّك مع جميع الناس في العملات سمّاحِ
ترى الدنيا لها سبعٍ عدوٍ يتبع الغرَّاتْ = وهو شيطان هذا الناس فالممسا والإصباح ِ
هَنِيّ أهل الأمانة كل من هو حي واللِّي ماتْ =على نور الهدى ماشي دام النور وضاحِ
اليا أقام الشهادة ثم صلَّى وأكمل الركعاتْ = وزكّا ثم صام الشهر وإلا الحج من باحِ
ترى ذيك الأمانة ثم يلحق غيرها جُمْلاتْ = وصُون النفس لا تغدي كما سارق ومزّاحِ
تذكّر يوم صلَّوا فوقك أربع جمع تكبيراتْ = وشالوك أربع وأمسيت في مَسْكان لحْلاحِ
وجوك اثنين مرسولين قالوا وش عندك هاتْ = يصفون الحساب اليا خِسر وان جاب الأرباحِ
وألا ياويل من تنقص موازِينه عن الوَزْنَات = يِسَمَّر في حديده قفلها من غير مفتاح ِ
وقُدَّامه جهنم كل ساعة جا لها زفراتْ = ويَسقونه شرابٍ يشربه في البطن ذحذاحِ
ومن تثقل موازينه ترى قُدَّامه الجناتْ = يِبشَّر كل يوم ونهار بالجنة والأفراحِ
ويعطونه كتابه باليمين مقابل الحَسْنَاتْ = ويُغفر له ذنوبه ثم يُمحى كل ما راح ِ
ويشفع له محمد في نهار الكرب والشدّاتْ = ويدخل جنة الفردوس جَنَّة عطرها فاحِ
أنا طالبك يا معبود يا من يغفر الزلاتْ = طلبتك تنظر فحالِتي يا رب الأرواحِ
أنا عبدك وابن عبدك وعبدك يطلب الرحماتْ = اليا صعب الدوا عفوك يداوي كل الاجراحِ
ترى هذي نصيحة خير لاهل الفكر والخبراتْ = نصيحة خير للِّي ما يجنِّب درب الأفراحِ
وقَبْل ختامها صلَّوا على سِيد البشر مراتْ = محمد كل من صلَّى عليه القلب يرتاحِ
واختمها بذكر الله في المِصْدار والورْدَات = عدد من غاص في بحر الجواهر كل سبّاحِ