سلام يا شيخٍ نصيتك مستجير = انته وَلَدْ هزَّاع خلّافها
يا ربعنا الواجب على الشيخ الكبير = يوم القبايل بيّنت ميقافها
قولوا لاخو عزه وسايرها يسير = كل القبايل شيوخها عُرّافها
والطير دون جْنَاح ما يَقْدر يطير = جِنْحَان مكتوفه وحِل اكتافها
من دون رَبْعَك في لوازمها مدير =شيخ القبيلة عِزَها ولحَافهَا
والله عطاك العز والحاسد قصير =من عزه المولى طلع مشرافها
معروف فاهِمْ للقليل وللكثير = يا عَمْ لا يَخْفَاك معنى قافها
طالبك دوّر حلها عند الأمير =واجب شيوخ القوم تحمى اضعافها
عندي ثَمَانْ أشخاص والتاسِع صغِير = أمانة الغايب بوجه أشرافها
عساك فالجنه يناديك البشير= تمسي وتصبح وسطها وأطرافها
مفروشك الديباج من فوق الحرير =رحمهٍ من الرحمن مثلك شافها
حتى بنات الحور عندك بالسرير = تاكل وتشرب من جميع اصنافها
والختم صلُّو على النور المنير = نبينا كامل جميع أوصَافَهَا

تمثلت بأمثالٍ لها فرع وفروعْ = وفرع المعاني مثل كل الفروعي
حياتي بداري بس خايف وممنوعْ = من أكل الثِمَر وخيار نَبْت الزرُوعي
ننادي وصُوت الخُوف ماهو بمسموعْ = ولا ينْفَعْنَا البكا والدموعي
قِلِيل الحَصيل اليوم يمشي ومفجوعْ = ويقضِي حياته فالخجل والخضُوعي
ولا له مع اللِّي يملك المال قَرْطُوعْ = ولا ياكل المرغوب من كل نوعي
وهذا زمانٍ عاش بهْ كل قَرْبُوعْ = طلع يوم غيره عذَّر فالطلوعي
حياة المذلّه كلها ذل وركوعْ = يموت الكريم ولا رضى بالركوعي
وطالب كريم الوجه والراس مرفوعْ = يكمّل حيَاتَهْ بالكرم والرفوعي
ولا عاد فالصُحْبة للاجواد منفوعْ = بعد ما تركنا سيفها والدروعي
ولا بد يوم الظلم زَايل ومَقْلُوعْ = كماما تِنْطِفي النار بعد الولوعي
ولو طالت الشِدَّه ترى الحبل مَقْطُوعْ = ولا طار طير الا رجع فالوقوعي
ترى الكَتْف لو أنه ورى العَضْد بالكُوعْ = عظامٍ بعضها مع بعض فالوجوعي
يطيح المنافق لو معه راس فاروعْ = ولو كان حطَّو في طريقه شموعي
ورأس المنافق لو كِبِرْ راس جربوعْ = مصيره كما كان نذل وخدوعي
مصير الردي بين الأحرار مخلوعْ = يجَازَى بما قدّم ولا له شفوعي
يخادع جميع الناس بافْعَال مَخْدُوعْ = ولازم يذوق من المراره جروعي
ويطوي ثياب الغدر في ثوب مرقوعْ = وتظهر عيُوبه من مكان الرقوعي
ويلقى حسابه في بيانَات مَجْمُوعْ = يحاسب على اعماله خبيث الطبوعي