يالله يالمعبود رب البريّه
يالخالق الرزّاق جزل العطيّه
تعلم بحالي في العلن والخفيّه
بديت بإسمك قبل الأعيان يبدون

خلقت خلقك للعبادة والأذكار
وأوعدتهم دارين عن كل ما صار
للمحسن الجنه وللعاصي النار
يالله دخيلك من شقا كل مفتون

وارسلت فينا من يبيّن لنا الدين
جاهد وكمّل وانجز بكل تمكين
حُجّه علينا يوم عرض الموازين
شفاعته للي بذكره يصلّون

من بعدها يا مرحبا بأهل الأعراف
إعداد من هلّل وكبّر ومن طاف
أشراف نوّخ ركبهم عند الأشراف
يا علّهم طول المدايا يدومون

أهلاً هلا باللي تعنّا وجانا
نفرح بهم في دارنا من وفانا
تكرم لحاهم يوم تكرم لحانا
منّا وفينا والذي كوّن الكون

عبادلة مكه وروس البراكيت
أهل المذاهب والشيم ذايعي الصيت
أشراف من خيرة نسب من هل البيت
تاريخهم محفوظ ذكره ومصيون

اخوان يجمع شملنا الجد الأول
مهما نسبنا بالتواريخ طوّل
لو حاولوا العُذال لا ما تحوّل
الاصل واحد والمخاليق يدرون

بأعطيكم النشره وكل العناوين
عن حالنا في يوم كنّا سلاطين
ما دامت الدنيا على العسر واللين
أمر الله أقوى حيل بالكاف والنون

أول ملكناها بعزم الرجاجيل
بالسيف والبندق وبالهجن والخيل
ماضي لنا معروف جيل(ن) ورى جيل
في صفحة التاريخ وافي ومضمون

دانت لنا الدنيا من الشرق للغرب
بالطيب والقوه وبسياسة الحرب
كانت لنا صوله وجوله على الدرب
مجد(ن) تعدّى بين الأدراج مركون

واليوم ننعم تحت راية بن سعود
رمز الوفا والمرجله راعي الجود
حاكم حكم بالعدل والعالم شهود
يحكم بشرع الله ولا يرتضي الدون

أسس لنا دوله على نهج الإسلام
سادت وقادت بالحقايق والأرقام
أمن وأمان وفاتحة خير وإنعام
يوم إن بعض الناس في الذل والهون

في ظل أبو متعب قويّ الشكيمه
وسلمان مع مقرن عسى الله يديمه
واخوانهم نبع الخصال العظيمه
يا علّهم في كل الأزمان يبقون

واحنا معاهم للمعادين عدوان
نحمي الوطن من كل حاسد وخوّان
اخوان في النعمه وفي الشده اخوان
هذا كلام الحق وإبليس ملعون

وختامها صلوا على صفوة الناس
سيد البشر خير الخلايق والأجناس
محمد المعصوم عن كل الأدناس
عدة حجيج البيت واللي يطوفون

قصيدة الشاعر الشريف علي بن صالح السبعي