قالوا: فقدته. قلت : غالي ومفقود= هو العزيز اللي علينا فقيده
شاعر قبيله كاسب المدح والزود= من روس قومن في الملاقا عنيده
دخاليه لا طقّوا العود بالعود= بيض الوجيه اللي تجي فالوعيده
أعزّي الأشراف شايب و مولود= فالشاعر اللي له معاني فريده
له ماقفن بين الرياجيل مشهود= وقفات عاطي للجماعه عديده
ياهاجسي مادامت الشعر موجود= اِرث الدخيلي بالبيوت الجديده
قُولِّي:أنا برثيه و ابليس مطرود=لاخير فيّ إن مانظمت القصيده
والله لا أخلّي الشعر حاوي و مردود= الشعر ورثه والهقاوي بعيده.

عايض بنى قافه وأنا جيت بردود= ماجور يابادع بيوت النشيده
شاعر ولد شاعر مثبّت و مسنود= والشعر يجري في مجاري وريده
من رِبعةن دايم لها سَبل ممدود= الطيب عاده و الخصايل حميده
شنابره ربعي لهم فعل ماكود= كم جيش دوله مهّنوا في عقيده
أشراف قوم العز والمجد والجود= الشاهد الله والخلايق شهيده
جانا عزاكم لاتكافون بـِنْـكود= جانا رثاكم وانشري ياجريده
عاطي توفّى وأصبح اليوم ملحود= ياعلّ روحه في جنانن رغيده
والموت دربن للملا دوم ممهود= الباقي الله والفنا في عبيده
واعيني اللي دمعها فيّض اسدود= واعيني اللي من بلاها نكيده
أسباب شيخن زاهي الذِّكر محمود= سلطان معنى و المعالي رصيده
ولاينبني بيتن بلا ساس و عمود= حكمه لجدّن قالها في قصيده
يقولها سيفن مجرّب و مجرود= ميراث ثابت في خزاين حفيده
و الحُر يَحْمَى ورثة الجد والعود= الشعر ورثه و المعارف سنيده.